(1858) Feliz llegada de SS. MM. y AA. a la ciudad de Oviedo
Ya la Reina está en' Uviedo;
ya la xente alegre danza;
y mil ixuxús s'escuchen
qu'el pueblu gozosu llancia.
Cuerren homes y muyeres
deseosos de miralla,
pos alloriáos d'afechu
están con ventura tanta.
Feliz ¡oh pueblu! que tienes
la dicha tan envidiada
de que á vesitate venga
la noble Reina d'España.
Esa Reina, que piadosa
ye del proble en'a desgracia,
el aliviu de sos penes
el consuelu de so alma.
¿Qué muncho ye qu'esta xente
teniendo fortuna tanta
non cese d'entamar dances
y en ixuxús se desfaiga?
Su queridu y rial esposu
amorosu la acompaña,
y la pequeña infantina
com'una azucena guapa.
Trai al Principe de Asturias
á quien Asturias aclama,
com'un anxelin hermosu
pos ye d'anxelin so cara.
Válgate'l Señor San Pedro,
Nuestra Señora te valga,
á quien homildes pedimos
te tenga siempre en so gracia.
Quiera Dios, niñin queridu,
fiu de ilustres monarcas,
qu'esti pueblu, de quien lleves
el timbre que nos ensalza,
te mira siempre dichosu
y en vida tranquila y llarga,
vea el mundo en tí otru Alfonsu
como'l Sabiu rey de España.
Quiéralo el Señor San Pedro
y la Virgen Soberana
á quien homildes pedimos
te tenga siempre en so gracia.